Schwalbenwand na skialpach

Schwalbenwand (2011 m n.p.m.) widzym praktycznie każdy dziyń, je to jedyn z wierzchołków po drugi strónie jeziora. Nima nijak piekny ani wyraźny, taki płaski trowiasty kopiec, ale z jego szczytu je super widok na fszystki stróny: Hohe Tauern na południu, Zell am See a Schmittenhöhe na zachód, Saalfelden a Steinernes Meer na północ, Hochkönig na północny-wschód.

W lecie żech go uż wyczłapnół pore razy, na skialpach żech go skoro wyczłapnół przi sfoji ganc piyrfszej skialpowej turze uż przed skoro 4 rokami… no, ale od tego czasu żech na nim nie był. Latosi sezon żech uż na poczóntku jesiyni zacznół rozmyślać, kaj by se dało chodzić na skialpy z Zeusym a trasa na Schwalbenwand była jednóm z ciekawych możliwości, bo kopiec nima nijak ekstra strómy a szyroki łónki mo Zeus rod. W listopadzie my z Zeusym dali lekki rekonesans pieszej trasy od Schloss Kammer, kiero se mi na skialpy zdała nejciekawszo, bo se do wychodzać prosto z doliny a oprócz tego żech jóm przed tym nigdy nie szeł ani w lecie. Doszli my ku Kammeregg Almu na 1230 m a stwierdzili, że by to tam isto szło wyczłapać a zjechać aji na skialpach. Nasze przypuszczynia żech puźniyj skonzultowoł z portalym Alpenvereinaktiv a ukozało se, że móm racje a że trasa od Schloss Kammer je znano i lubiano.

Prziszeł styczyń, porzóndnie nóm tu nafujało a tak my powtórzyli listopadowy rekonesans aji z Markét, tym razym uż na skialpach. Doszli my zaś ku Kammeregg Almu, było to fajne, stopa była wyraźno a zjazd dolnej czynści po zaśnieżónej szotolinie bezproblemowy.

Prziszeł dalszy styczniowy weekend, pogoda se zapowiadała bómbowo, Markét niestety musiała do pracy, tak my jóm z Zeusym podwiyźli do szpitola a ficzeli se to uż sami ku Schloss Kammer. Była dość brutalno inwerzja, przi wyjściu o 9.30 auto ukazowało -16°C, ale dośc wartko my niechali doline a mgłe za sebóm a mógli se kochać widokami. Tak se też pokochejcie… 🙂