Berlin

Nie chciało se mi tam jechać — podróż samolotym za moc drogo, podróż autym za moc dłógo — ale Market mnie ukecała. A nakóniec żech był strasznie rod.

Berlin mnie zauroczył. Szyroki ulice, pełno cyklistów, kupa zielyni — przed oczami se mi zmaterializowały moje marzynia na temat tego, co mi w Pradze brakowało do szczynścia. Pore razy żech se prziłapoł na tym, jak se wyobrażóm, jaki by to było tu miyszkać a studiować… Poradzieć se tak aspóń na chfile wrócić o 10 roków zpowrotym…

Marzynia marzyniami, w każdym razie żech był w Berlinie jako turysta. A byłech zadowolóny turysta: II wojna światowa i zimno wojna mnie dycki kupe interesowały a z tego punktu se Berlin ukozoł jako idealne miasto na poredniowe zwiedzani. Nie było ani moc trzeba nigdzi zaglóndać do muzeów, yny chodzić po mieście i wybiyrać se co ciekawsze miejsca na zastawiyni. A historia Berlina, jak ta wojenno tak powojenno, je fascynujónco.

Jechali my nakóniec autym: drogowskaz „Berlin 580 km”, kiery my mijali po 2,5 godz. jazdy kajsi koło München, móm do dzisia w pamiynci 🙂 Ale jednaczy nimiecki autostrady se sfoje dobre miano zasłużóm, także nóm ta podróż całkiym uciykła.